កំពង់ចាម៖នៅថ្ងៃសៅរិ៤កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី ០៥ ខែ កុម្ភៈ ឆ្នាំ ២០២២ លោក ស្រី សុភ័ក្ត្រ សមាជិកយុវជនគណបក្សថ្នាក់កណ្ដាល និងជាប្រធានក្រុមការងារយុវជនគណបក្សខេត្តកំពង់ចាម និង ឯកឧត្តម ឈួន វិន សមាជិកយុវជនគណបក្សថ្នាក់កណ្ដាល និងជាប្រធានក្រុមជនបង្គោលយុវជនស្រុកស្រីសន្ធរ បានចូលរួមជាគណៈអធិបតីក្នុងពីធីប្រកាសបញ្ចូលយុវជន ជាសមាជិកគណបក្ស ដែលពិធីនេះបានប្រព្រឹត្តទៅក្រោមអធិបតីភាព ឯកឧត្តម លូ គឹមឈន់ ប្រធានក្រុមការងារគណបក្សចុះមូលដ្ឋានស្រុកស្រីសន្ធរ និង ឯកឧត្តម ឈិត គឹមយាត អនុប្រធានក្រុមការងារគណបក្សចុះជួយស្រុកស្រីសន្ធរ។
ពិធីប្រកាសបញ្ចូលសមាជិកបក្សថ្មីនេះ ត្រូវបានរៀបចំឡើងនៅ ៤ទីតាំងផ្សេងៗគ្នា ដែលយុវជនជាសមាជិកបក្សថ្មីទាំងអស់ មានចំនួន ២,៩៧៦នាក់ គឺជាយុវសិស្ស មកពីវិទ្យាល័យទាំង ៦ និងជាយុវជនមកពីតាមបណ្ដាឃុំទាំង ១៤ ទូទាំងស្រុកស្រីសន្ធរ។
នៅក្នុងកម្មវិធីនេះ ក្នុងនាមក្រុមការងារយុវជនគណបក្សខេត្តកំពង់ចាម លោក ស្រី សុភ័ក្ត្រ បានចូលរួមសំណេះសំណាល និងអបអរសាទរជាមួយយុវជនដែលជាសមាជិកថ្មីរបស់គណបក្ស ហើយដែលលោកបានពោលពង្រឹងស្មារតីសមាជិកបក្សថ្មីទាំងអស់ឲ្យមានមោទនភាពក្នុងនាមជាសមាជិកគណបក្សប្រជាជនកម្ពុជា ដែលជាគណបក្សមានអាយុកាលប្រវត្តិតស៊ូយូរអង្វែង មានឧត្តមគតិមិនចេះប្រែប្រួល គឺកើតឡើងដោយសារប្រជាជន ជារបស់ប្រជាជន និង ដើម្បីប្រជាជន ជាគណបក្សដែលមានមេដឹកនាំខ្លាំង និងពោរពេញដោយធនធានមនុស្ស ជាគណបក្សដែលបានកសាងស្នាដៃច្រើនឥតគណនាក្នុងប្រវត្តិសាស្ត្រ និងជាគណបក្សដែលតែងតែផ្ដល់ឱកាសជូនយុវជនចូលរួម និងបន្តវេន។
បន្ថែមពីលើនេះ ឯកឧត្តម ឈិត គឹមយាត និង ឯកឧត្តម លូ គឹមឈន់ បានមានប្រសាសន៍សំណេះសំណាលបន្ថែម ហើយ ឯកឧត្តម លូ គឹមឈន់ ក៏បានឧត្ថម្ភដល់សមាជិកដែលបានចូលរួម នូវថវិកាម្នាក់ៗទទួលបានចំនួន ២០,០០០៛ សរុបថវិកា ចំនួន ៥៩,៥២០,០០០៛។
